कामठी-घोरपड-लिहीगाव रस्त्यावरील रेल्वे उड्डाणपुलाचे लोकार्पण
नागपूर समाचार : भारतासह बाहेरच्या देशांमध्ये ड्रॅगन टेम्पलबद्दल प्रचंड आकर्षण आहे. हजारो पर्यटक व श्रद्धाळू ड्रॅगन टेम्पलला भेट देत असतात. या सर्वांसाठी आता नवीन रेल्वे उड्डाणपूल सोयीचा ठरणार आहे, असा विश्वास केंद्रीय रस्ते वाहतूक व महामार्ग मंत्री ना. श्री. नितीन गडकरी यांनी आज (सोमवार, दि. २९ सप्टेंबर २०२५) व्यक्त केला.
केंद्रीय रस्ते निधीमधून कामठी-घोरपड-लिहीगाव रस्त्यावर बांधलेल्या ७०८.६६ मीटरच्या रेल्वे उड्डाण पुलाचे लोकार्पण ना. श्री. नितीन गडकरी यांच्या हस्ते झाले. त्यावेळी ना. श्री. गडकरी बोलत होते. या कार्यक्रमाला पालकमंत्री श्री. चंद्रशेखर बावनकुळे, राज्यमंत्री आशिष जयस्वाल, माजी राज्यमंत्री सुलेखा कुंभारे, भाजपचे जिल्हाध्यक्ष आनंदराव राऊत, माजी आमदार टेकचंद सावरकर आणि मल्लिकार्जून रेड्डी यांची प्रमुख उपस्थिती होती. मुख्य अभियंता संभाजी माने, अधिक्षक अभियंता जनार्दन भानुसे, कार्यकारी अभियंता पराग ठमके, उपविभागीय अभियंता संतोष खोब्रागडे यांचीही उपस्थिती होती.
ना. श्री. गडकरी म्हणाले, ‘कामठी शहर सुंदर, स्वच्छ व्हावे अशी सर्वांचीच इच्छा आहे. येथून कन्हानपर्यंत मेट्रो जाणार आहे. आता मेट्रोच्या खाली चारपदरी रस्ता झाला तर सौंदर्यात भर पडेल. या कामासाठी शंभर कोटी रुपये केंद्रीय रस्ते निधीतून द्यायला तयार आहे. पार्किंगची सोय झाली तर वर्दळ कमी होईल. व्यावसायिक संकुलांमध्ये छोटी दुकाने सामावून घेता येतील.’ कामठी शहराला चोवीस तास पाणी मिळेल अशी योजना तयार करण्याचे आवाहनही ना. श्री. गडकरी यांनी केली.
१६०० कोटी रुपये खर्चाच्या नागपूर-भंडारा चारपदरी रस्त्याला आणि ६०० कोटी रुपये खर्चाच्या कामठी ते गुमथळा रस्त्याला मंजुरी देण्याची घोषणा ना. श्री. गडकरी यांनी केली. कन्हान-कामठी ते वाडी-डिफेन्स अशी फ्लॅश चार्चींज बस सुरू करण्याचा विचार असल्याचेही ना. श्री. गडकरी यांनी सांगितले.
रेल्वे उड्डाण पुलाचे वैशिष्ट्य
नागपूर-जबलपूर व कामठी-गुमथळा-कुही तसेच नागपूर-कोलकता मार्ग जोडले जातील. नागपूर शहर, कामठी शहर व कामठी ग्रामीण भागाची वाहतूक सुरळीतपणे जोडण्यास मदत होणार आहे. ड्रॅगन पॅलेस या आंतरराष्ट्रीय प्रार्थना स्थळाकडे पोहोचणे सोयीचे झाले आहे. नागपूर-कामठी शहरातील अवजड वाहने पुलावरुन भंडाऱ्याकडे जाणे सोयीचे होईल. हा उड्डाणपूल ७०८.६६ मीटरचा असून या प्रकल्पाची किंमत ६५ कोटी रुपये आहे.
