नागपूर समाचार : जिल्ह्यातील 365 ग्रामपंचायतीच्या सार्वत्रिक व 12 ग्रामपंचायतींच्या पोट निवडणुका रविवार दि. 5 नोव्हेंबर रोजी होणार आहे. तर मतमोजणी सोमवार दि. 6 नोव्हेंबर रोजी तालुका स्तरावर होणार आहे.
यात काटोल तालुक्यातील 54, नरखेड 31, सावनेर 26, कळमेश्वर 22, रामटेक 30, पारशिवनी 17, मौदा 31, कामठी 11, उमरेड 27, भिवापूर 38, कुही 22, नागपूर ग्रामीण 27, हिंगणा 41 ग्रामपंचायतीध्ये निवडणुका होणार आहेत. निवडणुका असलेल्या संबंधित ग्रामपंचायतीच्या क्षेत्रात तसेच मतमोजणीच्या दिवशी मतमोजणी असलेल्या तालुकास्तरावर मद्य विक्री बंदचे आदेश जिल्हाधिकारी डॅा. विपीन इटनकर यांनी निर्गमित केले आहेत.
दि. 4 नोव्हेंबर 2023 मतदानापूर्वीचा एक दिवस, 5 नोव्हेंबर मतदानाचा दिवस, 6 नोव्हेंबर मतमोजणीच्या दिवशी मतमोजणी ज्या तालुक्याच्या ठिकाणी होत आहे त्या काटोल, नरखेड, सावनेर, कळमेश्वर, रामटेक, पारशिवनी, मौदा, कामठी, उमरेड, भिवापूर, कुही, नागपूर ग्रामीण, हिंगणा या स्थानिक स्वराज्य संस्थेच्या क्षेत्रामध्ये (मतमोजणीचा अंतिम निर्णय घोषीत होईपर्यंत) तसेच निवडणुका असलेल्या ग्रामपंचायतींच्या क्षेत्रात मद्य विक्री बंद राहणार असल्याचे जिल्हाधिकारी डॅा. विपीन इटनकर यांच्या आदेशात म्हटले आहे.
आदेशाचा भंग करणा-या संबंधित अनुज्ञप्तीधारकाविरुद्ध नियमानुसार सक्तीची कार्यवाही करण्यात येणार असल्याचे आदेशात नमूद करण्यात आले आहे.
