गोंदिया समाचार : केंद्र आणि राज्य सरकारच्या ‘सर्वांना मिळो घर’ या संकल्पाअंतर्गत राज्यातील प्रत्येक नागरिकाला घरकुलाचा लाभ मिळावा यासाठी शासनाकडून पूर्वीपासूनच विविध योजना राबविल्या जात आहेत. त्याच संकल्पाअंतर्गत गोंदिया विधानसभा क्षेत्रातील प्रत्येक गरजूला जमीन हक्क आणि स्वतःचे घर उपलब्ध व्हावे, यासाठी आमदार विनोद अग्रवाल सातत्याने प्रयत्नशील आहेत.
गेल्या काही महिन्यांपासून गृहनिर्माण योजनेच्या लाभापासून वंचित असलेल्या नागरिकांना योजना मिळवून देण्यासाठी येणाऱ्या अडचणींबाबत आमदार अग्रवाल शासनाशी सतत पत्रव्यवहार करीत होते. गोंदिया विधानसभा क्षेत्रात हजारो अतिक्रमण धारक असून त्यांना जमीन हक्क न मिळाल्याने गृहनिर्माण योजनेचा लाभ मिळत नव्हता. मात्र, महसूल मंत्रालयाशी सातत्याने पत्रव्यवहार व बैठका घेतल्यामुळे शासनाने सकारात्मक भूमिका घेतली असून शासकीय जमिनीवर मोफत घरकुल बांधकामासाठी हक्क पत्र देण्याची प्रक्रिया सुरू केली आहे.
या प्रयत्नांतर्गत गोंदिया विधानसभा क्षेत्रातील 2011 पूर्वीच्या 13 हजारांहून अधिक अतिक्रमण धारकांना जमीन पट्टे देण्याची प्रक्रिया सुरू करण्यात आली आहे. त्यांचे हक्कपत्र देऊन दिवाळीपासून या अतिक्रमण धारकांना योजनेचा लाभ मिळणार आहे. डिसेंबर 2025 पूर्वी सर्व अतिक्रमण धारकांना पट्टे देण्याचे लक्ष्य ठेवण्यात आले असल्याचे आमदार विनोद अग्रवाल यांनी सांगितले.
याशिवाय आमदार अग्रवाल म्हणाले की, जंगल जमीन क्षेत्रातील झुडपी जंगल राखीव क्षेत्रावर अतिक्रमण करणाऱ्या धारकांना देखील जमीन हक्क मिळावा यासाठी प्रयत्न सुरू आहेत. लवकरच सुमारे 3 हजार झुडपी जंगलातील अतिक्रमण धारकांना देखील जमीन हक्क मिळावा यासाठी शासन स्तरावर प्रयत्नांना गती देण्यात आली आहे.
